Murbyggjaren

det er berre eitt sett teikningar
berre ein målestokk –

og byggjaren har planert og bygd
ein grunnmur
etter nøyaktig oppskrift
-
Ja visst er der piratkopiar ute og går,
ja visst er det nokon som byggjer i hast
eller panikk
eller berre i manglande kjennskap
til det som alt er

for når regnet strøymer og stormen uler
og sola brenn i sin hete
smuldrar byggverka opp,
alt ligg tilbake som grus og skrap

og berre eitt står att,
berre ein grunnmur held
og kan bere
konstruksjonane
til eit heilt liv

1 Kor 3,11: For ingen kan leggja ein annan grunnvoll enn den som alt er lagd, Jesus Kristus.

 

Tomme hender

eg sit her på benken

og tørstar, eg svelt –

ropar etter smular, ber

om eit ord til mitt urolege hjarte

ein bodskap om forsoning,

noko som kan halde meg oppe

ei livline i mine indre stormar

eit anker å halde på

eller i det minste eit skilt, ei pil

som viser vegen mot målet –

men alt eg får

er tomme ord, jag etter vind

og dei same luftboblene

fylte av substanslause hjartekaloriar

-

eg rekk fram mine tomme hender

ropar i fortviling:

gje meg korset – gje meg håp!

Luk 12, 42-43:  Herren svara: «Kven er den trufaste og kloke hushaldaren, den som herren set over tenestefolket sitt så han skal gje dei mat i rette tid? Lukkeleg er den tenaren som herren finn i arbeid med dette når han kjem tilbake!

Konkret

-Guds rike-

det diffuse, uhandterlege

ordet

som ei tåke mellom linjene,

som vegar utan vegmerking

og der, rett ved meg

i all mi forvirring

står du sjølv

ein levande kropp

pusten som varmar

handa som strekk seg mot meg

for så konkret er du, Gud

så nær

i det kvardagslege –

at alle dei religiøse lenkene

dett av, og verda bleiknar

mot kjærleiken frå auga dine 

Luk 8, 1-3:  I tida som no kom, drog Jesus omkring og forkynte i byar og landsbyar og bar fram den gode bodskapen om Guds rike. Dei tolv var med han, og nokre kvinner som hadde vorte lækte for vonde ånder og sjukdomar. Det var Maria med tilnamnet Magdalena, som sju vonde ånder hadde fare ut av, Johanna, som var gift med Kusa, ein forvaltar hos Herodes, og Susanna og mange andre. Med alt det dei eigde, tente dei Jesus og dei tolv.

Slave i fridom

eg er slave

under det som skulle gjere meg fri

bunden

av mitt eige fridomsbrev

sett i lenker

og held endå nøkkelen sjølv –

den brenn i handa

og alt eg vil, alt eg lengtar etter

er å gje den frå meg,

la deg føre meg ut

til fridomen du kjøpte

til meg

Mark 2, 27: Og Jesus sa til dei: «Sabbaten vart til for mennesket og ikkje mennesket for sabbaten.