Anti-reklame

Du er god nok
Heilt og fullt god nok!
Du er eit stort pluss
i rekneskapen

Same kva andre seier:
Du er fin
Du er verdifull
Du treng ikkje endå fleire ting
for å bli betre

Det du kjøper
kan nemleg
aldri
gjere deg til ein betre person

Ta heller på deg
noko du har
Gå ein tur
og sjå at verda, og du, er vakker!

Eg har alltid vore interessert i media og mediakommunikasjon. Heilt frå den gongen eg lærte om reklameteknikk i norsktimane på vidaregåande, via medialinja på Bildøy bibelskule, til det at eg no sjølv underviser elevane mine om dette temaet, har eg vore oppteken av reklameteknikk. Det finst mykje god reklame, og det finst sanneleg mykje dårleg også. Same kva resultatet av ein reklamekampanje er, er målet alltid det same:

Få oss til å kjøpe produktet.

Måten seljarane prøver å overtyde oss på er ulik frå reklame til reklame, men ganske ofte er bodskapen eintydig: Kjøper du produktet, får du tilfredsstilt eit behov og du vert fornøgd/får det betre med deg sjølv.

Førre veke var eg på seminar på Lyngdal bibelcamping, og Jarle Haugland frå "Familie og medier" underviste om blant anna dei bodskapane reklamen prøver å overtyde oss med, og kor viktig det er å vere medviten dei ulike triksa.

Og nok ein gong sat eg og vart provosert... Provosert av dei menneska som sit og lagar reklamekampanjar, og med vilje gir oss dårleg sjølvbilde og falske behov. Fakta er at vi slett ikkje treng stadig nye ting. Vi treng ikkje den nye typen shampo for å føle oss vel. Vi er slett ikkje nøydde til å drikke cola eller kva det no skulle vere for å bli akseptert av andre.

Denne type reklame trykkjer oss ned, og fremjar ein bruk-og-kast-kultur som ikkje gavnar verken oss sjølve eller naturen.

Kva med å setje seg ned, eller gå ein tur, og vere fornøgd med det ein har? Kva med å stille seg dette spørsmålet neste gong reklamen, eller noko andre, seier oss at dette må du berre ha: Treng eg det verkeleg?

(Foto: frå Flickr; Bella)